Zyrtari Amerikan takim me studentët dhe të diplomuarit e KU Bedër
Shefi i Zyrës së Marrëdhënieve me Publikun në Ambasadën Amerikane në Tiranë, Z. Brian Beckmann, zhvilloi një bashkëbisedim me studentët e Departamentit të Shkencave të Komunikimit në Kolegjin Universitar “Bedër”. Krahas studentëve në nivelin bachelor dhe master, pjesë e takimit ishin edhe ish-studentë të diplomuar nga ky departament, të angazhuar në media të ndryshme të vendit. Bashkëbisedimi u fokusua në temën: “Liria e medias, marrëdhënia me politikën dhe sfidat e gazetarëve në Shqipëri”.
Z. Beckmann gjatë fjalës së tij nënvizoi rëndësinë që ka liria e medias për zhvillimin e demokracisë dhe rolin e rëndësishëm që ajo luan duke thënë TË VËRTETËN. Ai gjithashtu vuri në dukje nevojën për një marrëdhënie transparente mes mediave dhe politikës, si një nevojë për informimin e drejtë dhe të pandikuar të publikut. Më pas, duke shprehur mbështetjen për punën që bëjnë gazetarët, Z. Beckmann theksoi sfidat e shumta me të cilët përballen gazetarët, mbi rolin që kanë pronarët e medias dhe interesat e tyre që mund të lidhen me politikën. Gjithashtu u nënvizua rëndësia e evidentimit dhe pasqyrimit të rasteve të korrupsionit, si edhe rolin thelbësor që ka gazetaria investigative për evidentimin dhe verifikimin e këtyre rasteve.
"Në qoftë se ju do të përpiqeni të nxirrni në pah të vërtetën, ju do të ndihmoni jo vetëm për t’i dhënë formë të ardhmes së Shqipërisë, por edhe të kontribuoni në një shoqeri që funksionon më mirë. Ju mund të informoni dhe t’i përgatisni fqinjët dhe bashkëqytetarët qytetarët tuaj duke ju dhënë atyre informacionin e nevojshëm për tu bëre qytetarë më të mirë." u tha z. Beckmann studentëve.
Më tej, kreu i zyrës së Marrëdhënieve me Publikun në Ambasadën Amerikane foli për rëndësinë e mediave lokale në pasqyrimin e problemeve të komunitetit, duke sjellë si shembull mediat amerikane dhe interesin që kanë njerëzit për këtë kategori lajmi.
Pas fjalës së Z. Beckmann takimi vijoi në formë diskutimi mes studentëve dhe të pranishmëve. Studentët dhe gazetarët e rinj shfaqën interes për rolin që kanë mediat e reja në zhvillimin e demokracisë, si ndikimin e “fake news”, presionin me të cilin përballen gazetarët sot në Shqipëri, si dhe ndikimin që kanë mediat sociale në demokratizimin e hapësirës së informacionit.
Studentët vizitë pranë agjencisë së marketingut Source One
Studentët e vitit të parë në programin Marrëdhënie me Publikun dhe Komunikim Marketingu, në kuadër të lëndës Reklama dhe Promocioni zhvilluan sot një vizitë pranë agjencisë së marketingut Source One.
Studentët të pritur nga Jori Vila, Account Director, patën mundësinë të kuptojnë dhe të shohin nga afër punën e një agjensie, strukturën, pozicionet e punës, detyrat e përgjegjësitë për çdo pozicion, funksionimin e zyrës, marrëdhënien dhe komunikimin me klientët, si dhe mënyrat për të kuptuar dhe bashkëpunuar me ata.
Gjithashtu, nëpërmjet shembujve të projekteve të ndryshme, studentët u njohën me fazat, hapat e një projekti si dhe proçedurat apo improvizimet që realizohen gjatë tyre.
Përfaqësuesja e agjensisë iu përgjigj pyetjeve të shumta te studentëve dhe theksoi kënaqësinë e agjensisë Source One për të mirëpritur këta studentë për të realizuar internshipe, praktika mësimore si dhe për të bashkëpunuar në projekte të ndryshme.
Rikthim në Bedër si profesionistë
Në kuadër të aktivitetit “Rikthim në Bedër si profesionistë”, u zhvillua një bashkëbisedim mes të diplomuarve dhe studentëve të Departamentit të Drejtësisë. Të ftuar ishin Ermal Mema, i punësuar si asistent ligjor në studion “Bendo, Legal & Financial”, Mandrit Kamolli, i punësuar si asistent projektesh në organizatën “National Democratic Institute (NDI)” dhe Armando Sina, i punësuar si avokat pranë studios ligjore “ADCA”. Gjatë bashkëbisedimit, të ftuarit shpjeguan eksperiencën e tyre si studentë në Bedër dhe angazhimin e tyre në aktivitete ekstrakurrikulare, të cilat ndikuan në aftësimin e tyre të mëtejshëm, duke i mundësuar vazhdimin e studimeve master në vendet europiane, si: Francë, Angli dhe Itali. Më pas, u ndalën në eksperiencën e tyre të punës duke u dhënë studentëve këshilla dhe duke i orientuar rreth hapave që duhet të ndjekin, në mënyrë që të arrijnë të bëhen pjesë e tregut të punës. Aktiviteti u ndoq me interes nga studentët, të cilët krijuan kontakte me të diplomuarit.
Shpallen fituesit e esesë në gjuhën angleze
Departamenti i Gjuhës dhe Letërsisë Angleze në Kolegjin Universitar Bedër, për të gjashtin vit radhazi, organizoi ceremoninë e ndarjes së çmimeve për konkursin e esesë në anglisht për nxënësit e shkollave të mesme. Në konkursin me temë: “Si ka ndikuar globalizimi në edukim dhe mundësitë e edukimit në botë”, morën pjesë 147 nxënës nga 32 shkolla të mesme, publike dhe private.
Programi filloi me fjalën përshëndetëse të Kreut të Departamentit të Gjuhës dhe Letërsisë Angleze, Dr. Lokman Coşkun, i cili falënderoi të gjithë të pranishmit dhe pjesëmarrësit në konkurs, duke theksuar rëndësinë e shkrimit në organizimin e mendimeve, ndjenjave, dhe ideve, si dhe përmirësimin e aftësive të komunikimit në anglisht.
Më pas fjalën e mori Zv. Rektori për Marrëdhëniet Ndërkombëtare dhe njëkohësisht Lektor në Departamentin e Gjuhës dhe Letërsisë Angleze, Dr. William K. Martin. Ai prezantoi temën “Elementet e Shkrimit Akademik”, ku rëndësi të veçantë i dha psikologjisë së shkrimit, procesit të ideimit, strukturës së esesë dhe paragrafit, dhe më e rëndësishmja: plagjiatura dhe frika më e madhe e një studenti- një fletë bosh.
Ceremonia u mbyll me ndarjen e çmimeve. Esetë më të mira nga shkollat publike u shpallën ato të: Emiliano Simakut, Eljo Lekës dhe Mikela Sulës; përkatësisht nga Gjimnazi “Ismail Qemali”, Tiranë.
Tre më të mirët nga shkollat private ishin: Breana Shehetila nga Kolegji “Turgut Özal”, Antonio Bitri nga Instituti “Harry Fultz” dhe Aurora Mana nga Kolegji “Mehmet Akif”. Eseja më e mirë e gjithë konkursit u shpall ajo e nxënëses Era Kasmi nga Kolegji “Turgut Özal”, Tiranë.
Fituesit përfitojnë bursë të plotë nga Kolegji Universitar Bedër, ndërsa pjesëmarrësit e tjerë u vlerësuan me certifikatë pjesëmarrjeje.
Zyra e Klubeve Studentore në Kolegjin Universitar Bedër organizoi sot “Panairin e Klubeve”, i cili kishte në fokus prezantimin e aktiviteteve të klubeve dhe planifikimin e mëtejshem të tyre. Programin e hapi koordinatori i Klubeve Studentore, Idrit Lamaj, i cili përshëndeti dhe shprehu mirënjohjen për aktivitetet me karakter social dhe iniciativat e ndërmarra nga studentët përgjatë gjithë vitit akademik. Aktiviteti i sotëm u ndërlidh edhe me një program artistik, ku anëtarët e klubeve studentore performuan në skenë këngë dhe poezi të ndryshme. Panairi i Klubeve dhe organizime të ngjashme janë një traditë e KU Bedër, që prej nisjes së aktivitetit të tij.
Në kuadër të seminareve "Studenti dhe profesioni", organizuar nga Departamenti i Shkencave të Komunikimit, ishte e ftuar gazetarja e njohur Klodiana Lala.
Ajo diskutoi me studentët në lidhje me vështirësitë që ka raportimi çështjeve të bujshme në kronikën e zezë. Znj. Lala ndau me studentët disa nga eksperiencat më domethënëse të karrierës së saj mbi 20-vjecare në gazetari, si dhe sekrete profesionale që i kanë shërbyer si çelës për të kuptuar të vërtetat.
Studentet iu drejtuan gazetares Klodiana Lala me pyetje në lidhje me vështirësitë e profesionit, duke shprehur kuriozitetin që i ka ngjallur ajo si personazh, por edhe sektori i gazetarisë që ajo mbulon në media.
Këshilli Studentor i KU Bedër zhvilloi një takim në formë bëshkëbisedimi me drejtuesit më të lartë të këtij institucioni, të cilët shprehën vlerësimin për angazhimin e studentëve në përfaqësimin e zërit studentor dhe rëndësinë që ata kanë për të realizuar një bashkëpunim të frytshëm në vazhdimësi mes studentëve dhe organeve drejtuese të institucionit. Kjo për të rritur cilësinë dhe për të siguruar përfaqësim të mendimeve, sugjerimeve dhe ideve të studentëve. Gjatë takimit përfaqësuesit e studentëve patën mundësinë të diskutonin rreth kërkesave dhe sugjerimeve të ndryshme si dhe të paraqisnin ide projekte për të ardhmen me fokus tek zëri dhe energjia studentore.
Kolegji Universitar Bedër nënshkruan marrëveshje bashkëpunimi me Komunën e Strugës.
Sot në ambientet e Komunës së Strugës një delegancion i KU Bedër të kryesuar nga Prof. Dr. Ferdinand Gjana zhvilluan një takim me përfaqësues të administratës komunale si dhe Drejtorin e NP ”Proaqua”.
Takimi kishte për qëllim lidhjen e një marrëveshje bashkëpunimi mes dy institucioneve në fushën e arsimit, shkëmbimin e përvojave të studentëve, realizimin e punës praktike si dhe bashkëpunime të tjera ndërkufitare në kuadër të IPA fondeve.
Prof. Dr. Ferdinand Gjana prezantoi të gjitha programet të cilat ofron Kolegji Universitar Bedër, llojet e ndryshme të bursave, si dhe bashkepunimet e ndryshme me disa bashki dhe komuna, nga Shqipëria, Kosova dhe Maqedonia e Veriut.